maligayang pagbabalik
mukhang mabubuo na naman ang ating samahan,
kasama ang nanunuot na simoy ng malamig na gabi;
hahagkan mo na naman ako ng iyong mga alaala,
pagkatapos ng mapanlinlang na init na hatid ng umaga…
kaibigan, akala ko’y hindi na tayo muling magtatagpo,
sa pagtingkad ng pag-asang sa buhay ko’y bumago;
ngunit sadya yatang kukumutan mo akong muli pagdilim,
kasabay sa ulang dulot ng nagbabadyang takipsilim…
kahit na sa damdamin ay may init pang natitira,
tila hinding hindi na maitatago pa;
ngayong puso na ang nagbubukas ng iyong pintuan,
sa isang sulok ng aking isip isasama ka sa aking panaginip…
ngayon, atin na naman ang bawat minuto ng gabi,
kung saan ikaw kalungkutan ay hindi na maikukubli…
